Maiatza eta musika bat datoz Zelanda Barrian: musikaren hilabetea da. Lehenengo edizioa 2001. urtean egin zan eta helburua irratietan Zelanda Barriko musikarien lan gehiago entzutea. Eta lortu, lortu zuten. Maiatzean zehar, orain, kontzertu bereziak, tailerrak, eztabaidaguneak zabal antolatzen dira. Antolatzaile nagusia Zelanda Barriko Musika Elkartea da, baina askoren laguntza daukie antolaketan.

Holangoetan gertatzen dan lez, hilabete bateko ospakizunak, erreibindikazinoak, nahikoak ete diran eztabaida zabal dabil egunotan komunikabideetan. Ez nator ni itaun horri erantzutera, baina hilabete honetan Zelanda Barriko musika sustatzeko egiten dabizan ekitaldi batzuk interesante begitandu jataz eta aipatu bada be egin gura neukez:

• - Doan internet bidez hainbat musika talderen kantuak jaisteko aukerea dago Radio Control katean.
• - Komunikabide batzuk onlineko edizioan bideo edota doinu track berezien emisinoa egiten dabiz, NZ Herald adibidez.
• - Liburutegietan doako emonaldi bereziak antolatu dira.
• - Ukelele lako musika tresnagaz lehenengo kontaktua eukiteko tailer bereziak antolatu dabez.
• - Musika industriagaz zeozelango hartuemona daukienek doako eztabaida egun batean parte hartzeko aukera izango dabe. Eta ekintzetako bat, banan-banango mentoretza saio laburrak egitea izango da.

Argazkian, Auckland uriko liburutegi nagusian Space Ventura talde gazteak emondako kontzertua

Informazio gehiagorako: NZ Music Month webgunean